معلش يا احمد

بس انت ف موضوعك دا بعدت عن الموضوعيه

واهتميت بالشكل على حسب المضمون

انا بتفق معاك وبشدة
ان رسولنا عمره ما لبس اللبس اللى هما لابسينه دا وبالشكل بس فى ملحوظه هامه ان اللون الابيض سنه عن الرسول
كويس انك متعرضتش لاطلاق اللحيه لان فى احاديث صحيحه كتير بتوجبه
وبالنسبه لوصفك ليهم بانهم متشددين
فا هما علماء ف الدين الاسلامى مش بيجيبوا حاجه من عندهم هما بيقولوا قال الله وقال الرسول وفسره الامام فلان والامام فلان من الناس

وان كان فى تشدد ف بعض مواقفهم ف دا يمكن راجع لشدة ف طبع حد منهم
دينا مفيهوش مجال للاهواء
يوم ما تمسك على حد منهم غلطه ابقي اتكلم

سيدنا محمد قال ان الحرام بين والحلال بين وبينهما امور مشتبهات ،فمن تجنب الشبهات فقد استبرء لدينه وعرضه

وعن اختلاف اسلوب اللبس فا دى مش قضيه تستدعي الوقوف عندها ما عندك رجال الدين المسيحين بيختلفوا ف طريقة لبسهم و بيتفقوا احيانا
وكل واحد يلبس اللى يريحه مادام مش بيضر حد
لبس الجلباب الابيض مش عيب لان الخليجين بيلبسوه ولبس العمه او غطاء الرأس مش مشكله وعلى فكره تغطية الرأس سنه عن الرسول

ومن الاخر سؤالك اللى بيمثل عنوان البوست اجابته عندي

هو ليس رداء اسلامى وليس رداء وهابي وانما هو مجرد رداء
وان وضعنا هذا الرداء فى موضع ملاحظه وطرحنا حوله علامات الاستفهام
فلما لا نفعل ذلك مع رداء شيوخ الازهر ؟؟

انها كلها مجرد ملابس تريح من يلبسها ولا تضر من يراه

وهناك كثيرون من اتباع المنهم السلفي_واللذي لا يمثل وصمة عار_لا يلتزمون هذا الزي ويرتدون البدل

أختلف معك في أن هذا الرداء ليس للوهابيين فقط دون غيرهم .. كما أن الرداء ليس مهما أبدا لكن المهم هو ما يخرج من أفكار لمن يرتدي هذا الرداء

لكني أتفق معك في أن الشكل العام جزء من وسائل الإقنع بمفهوم الإعلام الحديث

المشكلة اللي حضرتك شايفاها دلوقتي في اللبس؟؟؟
طيب هو مش حرية شخصية برضه؟؟؟
طيب لابسينه علشان صاحب القناة سعودي او او
يعني دة مرسوم وقانون منهجي معروف ان كل من ارتدى هذا الزي اصبح للتملق او التشبه بالجزيرة العربية وووو زي ما تفضلت وذكرت
هو خلاص دخلنا في ضمائرهم
طيب ايه رأي حضرتك في التي شيرتات والباديهات اللي بيلبسها الشباب الذكور اليومين دول اللي بتلمع ولازقة على الجسم ؟؟؟
وايه رايك في الجينز اللي وسطه ساقط دة
طيب
ايه رأيك نتكلم في المضمون مش يمكن يكونوا بيقولوا حاجة تنفع بعيدا عن المظهر
ولا ايه
دمت بخير
تحياتي

نايل كوين

لم اتحدث عن اللحية او اللن الابيض
اتحدث عن الغترة و الدشداشة

عزيزيتي كلامك ان مفيش حاجة من عندهم ينطبق على الشريعة و ليس على الفقه و الفتوى اللى اغلب كلامهم عنه

متشديين لان فهمهم للفقه يتبروز في الحديث اللى انتى ذكرتيه

اجتنبوا مواضع الشبهات

فاصبح كل موقف يصادف الانسان حرام و خلاص عشان نبقى في المضمون

و كأن دراسة الفقه و علم الفتيا ليس لها مكان

انا مليش دعوة بالمسييحين ولا اليهود ولا غيرهم بس ليا دعوة بشيوخ مسلمين

زي شيوخ الازهر يرمز الى زي رجل الدين المصري و اي شخص هيشوف صورة واحد لابس جبة و قفطان و عمامة هيقولك ده شيخ من مصر

لكن الدشداشة الخليجية و الغترة دول تبع ايه بالظبط ؟؟

الدشداشة هو الجلباب الخليجي و لاحظي ان اغلبهم من اهل الاياف المعتادين على ارتداء الجلباب المصري الذي يرتديه اهلنا في الريف او الصعيد

و اللى هيرتدي بذلة هو يرتدي زي يرتدى في مصر لكن ملقيش في يوم شيخ مصري طالعلي بجيبة اسكتلندى و تقولولي عادي لنا ازياءنا و ملابسنا في مصر و بصراحة مش عايز اكون ماشي في يوم من الايام في مصر و احسن ان ماشي في الجزيرة العربية

يا مراكبي

سيدي الزي اساسا للبدو .. و الوهابيين بدو
و افكارهم يمكن بسهولة معرفتها بمجرد مشاهدة حواراتهم كتكفيرهم للشيعة مثلا

اتستطيع انت ان تكفر شخصا شهد ان لا اله الا الله و شهد ان محمدا رسول الله ؟

عاشقة النقاب

حرية شخصية لما يبقوا ناس ماشيين في الشارع مش بيطلعوا على التلفزيون و يتكلموا في ديني

ديني غير مسيس يا عاشقة

و كلامك معناه اننا عادي بقى لو طلعلنا شيخ لابس تيشيرت و بنطلون ديرتي

لازم الزي يبقى له احترامه و تدل على اسس الدين و انتماء الشخص

و هذا الزي الذي يرتدونه لا ينتمى الينا بأي حال ولا ينتمون اليه ايضا فهم من ارياف مصر و ليسوا من البدو

أنا جاي أسلم عليك يا أبو حميد
أخبارك إيه

انت بتخرف اهوه الحمد لله

اولا احنا مش اهل عشان نتكلم عن العلماء بالوقاحه دي

لا والدين عندك عمرو خالد والقرضاوي

يعني خدت في سكتك واحد اقل ما يقال عنه انه عالم جليل ورجل فاضل وهو الشيخ محمد حسان

مش لبس خالص الموضوع


وبعدين الغتره موجوده عند عرب سينا قبل ما الخليجيين يحلموا بيها اصلا

دا فضلا عن ان الرسول عليه الصلاة والسلام لبس 52 رداء مختلف زي ما جه في الاثر

انا مع حرية الرأي

بس مش مع التطاول على العلماء

لفظ نفاق كبير

ارجوك ارحم نفسك

مايكل

اهلا يا باشا ... ايه اخبارك؟

محمد رضا

بخرف .. وقاحة .. تطاول .. ارحم نفسك ؟

انت متعود تتكلم بالطريقة دي ولا الكرسي مش مريحك ولا فاطر برسيم عالصبح ؟

محمد حسان ده اللى قال على عمرو خالد افشل اهل الارض جميعا جاي بتقول عليه عالم جليل ؟
والله اللى انا شايفه ان عمرو خالد اثر في اخلاق الشباب فخلاهم يصلوا و يصدقوا القول و يعمروا في الارض
اما محمد حسان فأثر في اللبس بس , خلى الستات تلبس نقاب و مش مهم تذم و تنم و تغلط ما هي منقبة و داخلة الجنة ن شاء الله و خلى الرجالة يطولوا في دقنهم و ينصبوا و يرتشوا و مش مهم مهم مهما داخلين الجنة ان شاء الله

منهج محمد حسان في تقوية النفوس الضعيفة منهج فاشل لانه بيغير منظهر و رداء خارجي مش اكثر و عشان كده انا بنتقده

اقرا اكتر هتفهم اكتر و اتعود تخالف رأي غيرك بأدب

انا موافق علي كلامك في ان الملابس يجب ان تكون موحده لانها تدل علي شخصية البلد او الوظيفه
فرجال لاشرطه لهم ملابس واحده و لا يجوز لاحدهم ان يرتدي زي شرطي غير الزي الرسمي فكذلك رجا للادين فيما اري
ايضا اعتقد ان الملابس جزء من الشخصية القوميه فلولا ان شخصيتنا القوميه تعرضت للمحو و التهميش ما رايت هذه الصور الان

ذو النون

تحية الى اول المعلقين الذي الذين فهموا مغزى التدوينة

محو الهوية القومية

اللبس حرية شخصية
يعني عيب جدا لما تحط الشيح حسان والمصري وسط الناس العجب اللي فوق دول
وكمان وحش اوي لما تحط عمرو خالد قدوة واصلا مالوش مكان حتى لو كانت تحت الشيخ يعقوب
ممكن اوي كنت جبت الشيخ الجندي او صفوت حجازي لكن اللي معرفهلوش وصف ده اللي اسمه عمرو خالد .. يبقى اهانة لكل الشيوخ اللي موجودة في البوست بتاعك

الرحمة مصرية على فكرة بتاعة الشيخ حسنان واخواته.. مش سعودين خالص يعني

اللي شغال للسعودين هو اللي اتحط غلط في البوست بتاع زاعة عيش الغروب على اسطح المنازل

كل واحد حر في لبسه ما دام ما بيضركش في حاجة.. ولا بيتعبك في حاجة

ماظنش ان لبسهم يسيء لنا في اي حاجة .. مادام منهجهمم مظبوط.. اعترض انك تتريق على المنهج السلفي وتقول عليهالسلف.. لان السلفين يقال عليهم السلف الصالح .. ربنا يجعلنا منهم يارب

طيب كمان بتقول النبي صلى الله عليه وسلم مالبسش زيهم.. ولا لبس زي البتاع ده عمرو خالد..
يبقى خلاص يعني مش جرم عملوه.. السنة ابيض .. غترة بقى كوفيه طقية .. كل واحد حر .. المهم المنهج

هو لا رداء وهابي ولا خليجي ولا بتاع هو لبس بيريح اللي لابسه وخلاص

يعني انت لو لابس بنطلون جينز مريحك وحد قالك ده تشبهه بالفرنجه والصلبيين هتقوله ايه بزمتك؟؟!!

معلش لو اول تعليق ليا عندك اختلفت معاك فيه

بس الاختلاف في الراي لا يفسد للود قضية

فتافيت

الغريب انك بدأتي بإهانة واحد من انجح الدعاة .. سبحان الله تطالبيني بإحترامهم و تهيني انتى بعضهم

هو حرام علينا و حلال عليكي ؟

انا مقصدش قناة الرحمة طبعا لو كنتى كملتي قراءة كويس كنتى عرفتي مين

حلو اوي منهجك في تحليل الامور .. على كده الزملكاوية بياخدوا ثواب عشان لابسين شورتات بيضاء

لا طبعا الرداء بدوي و من ينكر ذلك لا يعلم

الاختلاف في الرأي لا يفسد للود قضية طبعا .. اقرأي تعليق ذون النون لتفهمي مغزى التدوينة

اهلا بك في اي وقت

اقول لك بيلبسو كده ليه؟
علشان اللبس ده بسيط
رخيص
مريح
و مافيهوش حاجة حرام
و هو لم يطلبو من احد ارتداء ملابسهم
كما لم يطلب عمرو خالد ارتداء البدلة
او القرضاوي من احد ارتداء ملابس رجال الازهر

يا اخي انت حر ما لم تضر
سؤل الشيخ الشعراوي رحمه الله عن الزي الاسلامي فقال ليس هناك زي اسلامي
هو الاخر لم يطلب من احد ارتداء الجلابية

muslimHuman

حبيب قلبي انا مقاتش انه حرام انا قلت انه طريقة اخرى لتهميش قوميتنا المصرية و استيراد ملابس من الخليج و صبغ الطريقة الدينية عليها فاليوم لا احد يلبس الغترة و الدشداشة و له دقن الا اذا هيكون امام او شيخ و من 20 سنة الكلام ده مكانش موجود

أخي الكريم
لحوم العلماء مسمومة .. فاحذر الخوض فيها بلا علم

من أنت لتحكم على فكر كامل ومنهج يتبعه الملايين؟
لو كان حتي نقدك موضوعي كنا عذرناك
لكن إنت بتتكلم فى حاجة هايفة جداُ .. وهيه اللبس.

حتي نقطة التشدد الى ذكرتها فذكرتها مبهمة ومطلقة بلا تبيين أو توضيح
على فكرة الشيخ القرضاوي شفته أكثر من مرة مرتدياً الغطرة والجلباب

إتقي الله يا أخي

وبعدين الراجل بتاع الخليجية ده تاب وعمل قناة إسلامية على أنقاض قناة أغاني وكليبات .. وده بتوفيق الله طبعاً وبتيسير الشيوخ اللى إنت بتتكلم عنهم بمنتهي الفظاظة.

أنا كنت ادخل أسلم عليك قبل الفجر
لكم بجد الكلام ده أذاني جداً جداً جداً
الله يسامحك يا أخي

د. ياسر
اولا :اسف لو كنت اذيتك بكلامي
هو ليه كل واحد بيدخل يعلق مبيقراش التعليقات اللى قبله

لو كنت قريت ردي عليها كنت فهمت كلامي و بقصد ايه

عند صورة القرضاوي كتبت ايه ؟
و هذا زي لما يرتديه رجال الدين الازهريين في مصر
في مصر
في مصر
في مصر
في مصر

عمرك شفته لابس الغترة في مصر ؟

انا ميهمنيش يلبسوا ايه براها بس اللى يهمني لابسين ايه هنا

على فكرة قناة الخليجية نزل منه قناة الخليجية 2 و شغالة اخر حلاوة و بتكسب زي الفل ولا اتقفلت ولا حاجة

نورت

يا أخي الكريم
أولاَ الشيوخ والعلماء قالوا أكثر من مرو إنهم لا يتقاضون أجر من القنوات
وقالها نصاً رئيس قناة الناس
ثانياً حتي لو بيتقاضوا فده شرعاً يجوز
والأستاذ الداعية المحترم عمرو خالد والشيخ الكبير القرضاوي بعض أحيان بيتقاضوا ومفيش مشكلة

من حققك تتتكلم فى فتاويهم أو أسلوبهم لو إنت على علم
لكن مش من حقك أبداً إنك تتكلم عن نياتهم ومصدر رزقهم وتلمز عليهم بالقول والتهكم والسخرية الواضحة .. لأن دي بتاعة ربنا

فناة الخليجية إتنين دي دينية .. يعني الناس عملوا قناة تانية دينيةة لما الأولي نجحت
إبحث على جوجل وإنت تعرف
لكن من الواضح إنك لغبطت بين قناة (خليجية) وقناتي (الخليجية)
يعني الفرق بينهم ألف ولام فى الإسم.. لكن بين السماء والأرض فى المضمون
ثاني حاجة حتي لو كلامك صحيح بخصوص وجود قناة الخليجية إتنين فده ميمبنعش إن خليجية واحد إلي الأن إسلامية بلا أى مخالفات تذكر وده بفضل الله تعالي
قناة إقرأ اللى بيخرج منها مشايخ كثير من اللى إنت دافعت عنهم صاحبها مين؟
وعنده قنوات تانية إيه؟

دي تاني نقطة

ثالث نقطة بالنسبة للغطرة
من مشايخ وعلماء السلفية مبيلبسوش غطرة ولا حاجة
زي الشيخ المقدم وياسر برهامي وحتي أبو إسحاق الحويني
ومنهم الأزاهرة وبيلبسوا زي الأزهر زي عبد البديع أبو هاشم
ومنهم اللى بيلبس بدل وكرافتات زي الدكتور حازم شومان
يعني كلامك عن اللبس كله بلا أي داعي
وكل إنسان يلبس اللى يريحه
فيه والله شيوخ صوفية ومصريين وعايشين في مصر وبيلبسوا غترة وجلباب عادي جداً
مسألة اللبس مش قضية
وتوحيد اللبس مش ضرورى .. إحنا مش فى منتخب كرة اليد

أما التشدد فبرده لا حجة لك فيه
لأن أصلاً التشدد ده مصطلح فقهي
الناس دي مجابتش حاجة من عندها وألزمت بيها الناس .. دي أحاديث وايات وسبقها فى الفهم ده أئمة كبار وعلماء على مر التاريخ.
لكن إحنا اللى بقينا بنتسيب فى أمور ديننا علشان كده الناس اللى بتتمسك أوي بنسميها متشددين.
وأنا لا أقصدك إنت أبداً
وحتي لو أخطأ أحدهم وزلت قدمه فلازم نستره ونقيل عثرته
ولا أريد أن أذكر لك أثله فى زلات أقدام من تبجلهم لأني أبجلهم أكثر منك وأعرف لكل مقامه.

وكمان مين قلك إنهم كفروا الشيعة؟
يا عم إقرأ مناهجهم وفهمهم للقضية صح قبل ما تتكلم
إعرف تكفير الذوات وتكفير العين وتكفير القعل .. وبعدين أنهي شيعة اللى كفروا ومين مكفرش وكفروهم ليه
شفت مناظرة قناة المستقلة بين الوهابية كما تقول والشيعة
كل شوية الشيخ يقول أخوننا الشيعة
يبقي أكيد مكفرهمش
لو عاوز تختلف يبقى على علم وبينة

إنت عكمان بتقول على محمد حسان إن منهجه فاشل
الله يسامحك
محمد حسان يا أخي الكريم بيحضرله فى الدرس الواحد مئات الألاف .. وإسأل أيى حد حضرله قبل كده فى رمضان فى العزيز بالله
محمد حسان منهجه فاشل
عارف يا أخر الكريم لولا إني مش عاوز أعمل بلبلة كنت والله جبتلك مناهج ناس تاني ووريتلك الفشل فين بالظبط.

أخي الكريم
والله أنا مش قصدي أثقل عليك الكلام
ولا غرضي إني أضايقك
لكن كما قال بن عساكر لحوم العلماء مسمومة
إيك والخوض فيها
وأنا ما رددت إلا علشان خايف عليك أولاً
وثانياً علشان أنال شرف الدفاع عن ناس نحسبهم من العلماء.
أناشدك بشدة إنك تيل البوست ده نهائياً
كفانا بلبلة وكفانا تفرقة .
أسأل الله لي ولك الهداية
وربنا يرينا الخير خيراً واروزقنا إتباعه وارنا الشر شراً وارزقنا إجتنابه

نسيت أقولك كمان ياريت تقرأ سيرة الشيخ محمد بن عبد الوهاب وتشوفه عمل إيه.. يكفي إنه أقام الدولة السعودية كلها

د ياسر

شكرا على توضيح نقطة قناة الخليجية , و استغفر الله على بدر مني و لكن ما دفعني لكتابة هذا اني رأيت بعيني اعلان افتتاح قناة الخليجية كليب 2 في شريط اعلانات قناة الناس اثناء حلقة الشيخ محمد حسين يعقوب


ثانيا : يا اخي مليش دعوة بالمنهج السلفي حتى لو كنت لمحت له عشان اوضح ان اللي بيتكلموا عن السلف مش لابسين لبس السلف يعني مش بتكلم عن السلفية انا بتكلم عن التناقض و رفضهم للمدنية بحجة التدين .. بص يا اخي الفاضل .. بصراحة كده .. انت اقرب لك انك تلبس بدلة ولا تلبس جلباب و غترة ؟ و متقوليش البس اللى يعجبني و الكلام اللى لا يودي ولا يجيب .. هتلبس بدلة لكن لو انت اتكلمت في الدين هتبقى عايز تلبس جلابية و غترة عشان دي بتديك وجاهة دينية مبنية و انت قلت
------
والله شيوخ صوفية ومصريين وعايشين في مصر وبيلبسوا غترة وجلباب عادي جداً
------
كلمة عادي جدا دي مصيبة لاننا كمصريين اجدادنا صمدوا امام اي غزو فكري ايام الحروب مش قادرين نصمد امام غزو فكري في زمن السلام و ده في نواحي كتير جدا جدا غير الغترة و الجلابية

بالنسبة للتشدد.. اسف و لكن مبدأك خاطئ .. تفسر بإيه اختلاف الاراء الفقهية ؟ واحد هياخد حتى بالحديث الضعيف و واحد مش هياخد بيه .. واحد بيقول ان النقاب واجب و عدم ارتداؤه حرام ده يبقى تشدد ولا ده عادي جدا زي الغترة و الجلابية ؟


انا مش بكره محمد حسان , انا اكره طريقته في عرض منهجه و كأنه معصوم , انت شفت كان بيشتم ازاي في عمرو خالد و والله يا اخي انا اعرف الكثير من الشباب اللي تأثروا بعمرو خالد الى الافضل و معتقدش انه يستحق هذا اللعن من محمد حسان

السلفيين مش بيكفروا الشيعة ؟
اعتقد انك انت من يريد القراءة اكثر
اغلب السلف يعتبر الشيعة كفار و هما ليه الشيعة بيكرهوا الامام محمد بن عبد الوهاب ؟ عشان كفرهم و امر بهدم النجف و كربلاء و ان جاء من الشيوخ من لم يقل بكفرهم صراحة بل قال انهم ان لم يعظموا الاضرحة و لم يسبوا الصحابة فهم اهل بدع فقط !!

و اسوق لك بعض و ليس كل ما يقوله السلفيين من ادلة لتكفير الشيعة

قال البخاري : (ما أبالي صليت خلف الجهمي و الرافضي، أم صليت خلف اليهود و النصارى و لا يسلم عليهم و لا يعادون و لا يناكحون و لا يشهدون و لا تؤكل ذبائحهم) . خلق أفعال العباد ص 125
و قال ابن كثير عند قوله سبحانه و تعالى : (محمد رسول الله و الذين معه أشداء على الكفار رحماء بينهم تراهم ركعاً سجداً يبتغون فضلاً من الله ورضواناً سيماهم في وجوههم من أثر السجود ذلك مثلهم في التوراة ومثلهم في الإنجيل كزرع أخرج شطئه فآزره فاستغلظ فاستوى على سوقه يعجب الزراع ليغيظ بهم الكفار .. ) قال : ( ومن هذه الآية انتزع الإمام مالك رحمة الله عليه في رواية عنه بتكفير الروافض الذين يبغضون الصحابة قال : لأنهم يغيظونهم ومن غاظ الصحابة فهو كافر لهذه الآية ووافقه طائفة من العلماء على ذلك ) . تفسير ابن كثير ( 4 / 219 )
و قال القرطبي : ( لقد أحسن مالك في مقالته وأصاب في تأويله فمن نقص واحداً منهم أو طعن عليه في روايته فقد رد على الله رب العالمين وأبطل شرائع المسلمين ) .تفسير القرطبي ( 16 / 297 )
روى الخلال عن أبي بكر المروذي قال : سألت أبا عبد الله عمن يشتم أبا بكر وعمر وعائشة؟ قال : ما أراه على الإسلام . وقال الخلال : أخبرني عبد الملك بن عبد الحميد قال : سمعت أبا عبد الله قال : من شتم أخاف عليه الكفر مثل الروافض ، ثم قال : من شتم أصحاب النبي صلى الله عليه وسلم لا نأمن أن يكون قد مرق عن الدين ) . السنة للخلال ( 2 / 557 - 558 )
ساق ابن كثير الأحاديث الثابتة في السنة ، والمتضمنة نفي دعوى النص والوصية التي تدعيها الرافضة لعلي ثم عقب عليها بقوله : ( ولو كان الأمر كما زعموا لما رد ذلك أحد من الصحابة فإنهم كانوا أطوع لله ولرسوله في حياته وبعد وفاته ، من أن يفتاتوا عليه فيقدموا غير من قدمه ، ويؤخروا من قدمه بنصه ، حاشا وكلا ومن ظن بالصحابة رضوان الله عليهم ذلك فقد نسبهم بأجمعهم إلى الفجور والتواطيء على معاندة الرسول صلى الله عليه وسلم ومضادته في حكمه ونصه ، ومن وصل من الناس إلى هذا المقام فقد خلع ربقة الإسلام ، وكفر بإجماع الأئمة الأعلام وكان إراقة دمه أحل من إراقة المدام ) . البداية والنهاية ( 5 / 252)


و بالنسبة للدولة السعودية .. فمحمد بن عبد الوهاب اعطى الشرعية لمحمد بن سعود لانهم نسايب و لازم يقفوا جنب بعض .. التاريخ مليان بحكايات تحالف القوة و الدين لتكوين الدولة

نهاية .. اشكرك و جزاك الله خيرا

أخي الكريم جزاك الله خيراً على رجوعك وأستجابتك بشأن قناة الخليجية
وقناة الخليجية إثتنين زي ما وضحت هيه قناة إسلامية صرف .. وكلمة كليب أظنها غير مقصودة وده بحسن ظننا فى الناس بتوع قناة الناس لأننا نحسبهم لي خير
وأرجوك أن تصلح الخطأ ده وتوضحه للناس لأن الرجوع إلي الحق شرف كبير جداً
بجد بجد إنت كده أثبتيلي إنك شخصية محترمة

ثانياً
أما بالنسبة للبس للمرة المليون هقولك إنه حتي لو غلط فمش هيه دي القضية اللى تخلينا نتريق على الشيوخ
لو كانت سيئة ليهم فامزجها ببحر حسناتهم ولن تجدها بعد الأن
دي علي فرض إنها سيئة .. لكن هيه مش سيئة ولا حاجة وكل إنسان ليه الحق في لبس ما يشاء
وبعدين يا أخي الكريم لو أخدنا الموضوع من وجهة نظر تانية
هنلاقي إن الغترة جاية من الخليج ولا بلدة جاية من الغرب.. فأنهي الأقرب؟
الكرافتة فى عصر من العصور كانت إحدي الملابس المميزة للنصاري ولكن عمت بها البلوي وذهبت ميزتها
أظنك فهمت قصدي اللبس مش قضية كبيرة ومتحتاجش كل الخلاف ده ولا تستاهل إننا نتريق عليهم بسببها
(كلامك يا أخي وحتي لو مكنتش تقصد واضح جداً فيه التريقة والغمز واللمز)

إتفقنا على النقطة؟

بالنسبة للتشدد
والله منهجي مش خاطيء ولا حاجة
النقاب أنا معاك إنه مش فرض
لكن ده رأي معتبر جداً وقاله بيهأئمة كبار جداً جداً
وكمان من الأئمة الأربعة من قال بذلك
يعني أحمد بن حنبل كان متشدد ووحش وكمان بن القيم وبن كثير وفي تفسير بن كثير والقرطبي والجلالين الكلام ده
القول بفرضية النقاب ليس تشدد أبداً
الموضوع فيه خلاف سائغ والمؤمن يختار أيهم أقرب له من حيث الأدلة ولا إنكار على المخالف.

كمان الأخذ بالأحاديث الضعيفة في فضائل الأعمال فيه خلاف بين علماء الحديث
ووافقهم من الأئمة الأعلام البخاري ومسلم فهل كانوا متشددين؟
خلاف سائغ يا اخي الكريم مش تشدد

محمد حسان سمعته مرة واحدة بيتكلمعن عمرو خالد وتكلم بإسلوب لم يعجبني أنا شخصياً
لكن يا أخي الكريم عمرو خالد ليه أخطاء فادحة لم يأبي إنه رجع عنه أو إنه يظهر للناس ويقول أنا أسف.
وحتي شيوخ كثير إتكلمواعنها غير محمد حسان ومنهم وجدي غنيم والشيخ الرقضاوي نفسه فى أزمة الذهاب إلي الدنمارك إنتقده.
يبقي مش بس محمد حسان ومش ده اللى يخلينا نكرهه
وعلي فكرةأنا مبحبش أخوض فى الموضوع ده لأنه شائك وانا شخصياً بحب الأستاذ عمرو خالد وليه فضل عليه بعد ربنا في إلتزامي.
وكمان محمد حسان ليه جمهور عريض من كل أنحاء العالم لا يقل إن لم يزيد عن جمهور عمرو خالد وناس كثير إلتزمت بفضل الله تعالي أولاً ثم بسبب تيسير الله وجود محمد حسان
ولم نسمع إنه هاجم حد قبل كده
يبقي لازم نغفرله خطيئته دي لو كانت خطيئة
وأقسم لك بالله إني أعرف إنه مدح عمرو خالد قبل كده كمان.

بالنسبة للشيعة
يا أخي الكريم دول مش سلفيين
دول السلف شخصياً
الشيعة دول فرق وطوائف كثير زي ما إنت عارف وتكفيرهم حاجة إسمها تكفير نوع
يعني همه أفعالهم كفرية لكن همه مش كفار
يلزم إنتفاء الجهل .. دول يعذروا بجهلهم
يعني السجود للقبور ده كفر طبعاً
والدعاء كمان كفر لكن هل كل من يدعوا الحسين من دون الله كافر؟
عل حسب العذر بالجهل
فهمتني؟
وأنا معك إني محتاج أقرأ
بس أنا متأكد من كل كلمة قلتهالك

أما بالنسبة للشيخ محمد بن عبد الوهاب
فأنا قرأت سيرته كاملة
عمري ما سمعت الكلام ده
أدالي الشرعية علشان كانوا نسايب؟
طيب كان إداها لأخوه اللي كان بيهاجمه
علي الأقل أقربله
يا أخي الشيخ محمد بن عبد الوهاب كان مش لاقي حد يقف معاه خالص ولا يدعمه
ولما راح لأولاد سعود وقفوا معاه جداً واقتنعوا بمنهجه وكانوا بيحاربوا مع بعض ونشروا المنهج ده مع بعض

أستحلفك بالله تقرأ تاني فى الموضوع ده
أنه مش صحيح بتاتاً

كل ودي وإحترامي
واسف على الصداع اللى سببتهولك
لكن يكفي إننا بنتناقش من أجل معرفة الحق
وبجدد طلبي ورجائي ليك بحذف البوست ده
يا أخي وجه قلمك لليهود ولأمريكاأفضل من توجيههه لنقدعلماء الأمة أو على أقل الأقوال إخوانك

اخي الكريم د.ياسر

شكرا على اطراءك و احسبك انت السماء ان كنت انا ارضا و جزاك الله خير


موضوع الشيخ محمد حسان اعتقد اني ملت لرأيك بعض الشئ و لكن هذا لا يغير نظرتي اليه و اتهامي له بالغرور فلن نخوض فيها

لما يبقى الاختلاف مجرد اختلاف يبقى انت بتنفى التشدد نهائيا في الفتيا الاسلامية ؟ و هذا غير معقول فأنت سميت التشدد مجرد اختلاف !! فالمحكمة الشرعية التى حكمت على الطبيب المصري ب 1500 جلدة لا يمكن ان نعتبر هذا مجرد حكما مختلفا


يعني لما بن باز ينهي عن محبة الشيعة الامامية الاثنى عشرية و الشيخ شلتوت يقر بأنه مذهب يمكن التعبد به ده ميبقاش اختلاف عادي , في حد فيهم على خطأ

و عموما انا جبتلك بعض من اقوال السلف و المقصود طبعا الشيعة الامامية اما باقي طوائف الشيعة الباطنية فأمرهم لا اختلاف عليه

بنت محمد بن عبد الوهاب كانت زوجة ابن محمد بن سعود و هكذا جاء التحالف الذي صنع الامارة

على فكرة كتبت مقالات كتير عن اسرائيل او امريكا او من يعادي الاسلام و صممت موقع دعوي اسلامي , انا يا اخي لست خارج عن الدين انا خارج على الاشخاص الذين لوثوا سماحة الدين بتشددهم و تهجمهم

طبعاً إنت كرهت اليوم اللى دخلت صبحت عليا فيه
وطبعاً كرهتني شخصياً
بجد أنا أسف على كمية الصداع اللى سببتهالك
بس يا أخي والله أنا مش قصدي

بس كلامك فيه إتهامات صريحة جداً لناس أنا بحبهم وعارف منهجهم

وكمان النقاشات دي بجد هيه اللي بتثري الحركة التدوينية

لو كنا إتفقنا علي موضوع قناة الخلجلية
وكمان اللبس لوحده مش قضية
مش باقي غير مسالة التشدد

الشيخ شلتوت لما أقر بمذهبهم يا أخي الكريم
كان بيقر بمذهب فقهي
يعني منظرش يومها للعقيدة بتاعتهم
ولو كان نظر مكنش أقر العقيدة دي أبداً
وعندك الدكتور عبد الله سمك رئيس قسم الأديان والمذاهب فى الأزهر .. وده ملهوش توجهات غير أزهرية يعني راجل محايد
كلامه فى الشيعة صعب جداً
والإثني عشرية ليهم عقائد فاسدة إنت تعلمها لأن واضح عليك الثقافة
فلما شيخ تاخده الحمية على دينه ويقول منحبهمش وحتي لو إنت بتخالفه يبقي المفروض تعذره
يعني الناس اللى بتنادي بالسماحة وحق الإختلاف زيك وزي كل الفضلاء يطبقوا الكلام ده على نفسهم الأول؟
ولا إنت مش معايا؟

أما إتهامك للشيخ حسان بالغرور
فأسأل الله أن يهديه لو كان ذلك وأن يثبت لك إنت العكس لو مكنش مغرور
ومش هنخوض فى الموضوع ده زي ما إنت بتحب

أنا لا أنفي التشدد ابداً
لأنه موجود بالفعل
لما واحد يطلع بحاجة مش فى الدين أو رأي ضعيف جداً ويقفش فيه ويقول هوه ده الصح وكل ما دونه غلط
يبقي كده متشدد طبعاً
وكمان الشيخ اللي تشدد في فتوي معينة ميبقاش وحش أوي وزفت .. يبقي غلطان وربنا يهديه
الشيخ يعقوب مثلاً ساعات بيتشدد جداً فى النقاب وبيقول عليه قولاً واحداً فرض
ده طبعاً كلام غير مظبوط
والشيخ ربنا يهديه فيه
لكن لا نشتمه ولا نتهكم عليه ولا نسيحله كده.

أو زي الثلاثة اللى راحو للرسول وواحد قال أنا هصوم على طول والتاني قال أنا لا أنكح النساء والثالث قال أنا مش هنام
الرسول عاب عليهم وقال من رغب عن سنتي فليس مني

أما الشيخ محمد بن عبد الوهاب
فالتحالف جاب النسب وليس العكس
وحتي لو العكس فبرضه مش حاجة عيب
بص للي عملوه
إنت عارف إن الناس كانت بتبني القبور حوالين الكعبة وتروح تزورها؟
عارف إنهم كانوا بيعبدوا حجر وشجر؟
عارف إنهم كانوا مش فاهمين حاجة في دينهم؟
عارف إنهم كانوا متفرقين وكل قبيلة مع نفسها؟

أكيد عارف طبعاً
لما حد بقي يقضي علي كده بمساعدة نسايبه؟
يبقي دي حاجة عيب؟
محمد عبد الوهاب كان راجل مصلح ومجدد ومحدش يقدر ينكر كده
حتي الشيخ القرضاوي بيقول عليه كده
والشيخ حسن البنا لما عمل الإخوان قال عنها دعوة سلفية .. لأنه كان معجب بدعوة محمد بن عبد الوهاب

ربنا يكرمك في دفاعك عن الإسلام
وربنا يجعل كل أعمالك في ميزان حسناتك
وأناطبعاً لم أقصد أبداً إنك خارج عن الدين
ينقطع لساني لو كنت أقصد كده
وأسف لو كنت فهمت من كلامي كده
وكلنا خارجين عن اللي بيلوثوا الدين
ومتفقين في كده
لكن مختلفين في تحديدهم
ومظنش إن ولا واحد من كل الناس اللى إنت حطيت صورهم وقلت منهجهم سلفي بيلوث الدين

يا أخي الكريم لو كانت نظرتك فعلاً إتغيريت في عدة مسائل
وقلت نبرة الإختلاف في بعضها
فليه متلغيش البوست أو على الأقل تقلل حدته وتلغي كلمة المنهج السلفي وصور الشيوخ الأفاضل دي
لا الشيخ مسعد أنور ولا الدكتور جمال المراكبي ولا محمد حسان ولا وحيد عبد السلام بالي ولا مصطفي العدوي ولا الشيخ يعقوب يستاهلو كده
قول رأيك في الغترة بلا صور ولا لمز على السلفية والوهابية والكلام ده
كفاية نزاعات بينا
كلنا بنحب الدين وكلنا بنحب شيوخنا والكلام ده مش هيفيدنا بحاجة

د.ياسر

اسف على التأخير لظروف خارجة عن ارادتي
و متقولش كرهتك و الله الذي لا اله الا هو اني احببتك في الله

يا اخي الشيخ شلتوت منظرش للمنهج العقائدي ؟ ده كلام برضه ؟ و هل عالم كبير هتفوفته حاجة زي كده و يتكلم عن مذهب دون تحدبد اذا كان يقصد المنهج الفقهي ولا العقائدي ؟

اظن انك اتفقت معي على موضوع التشدد دون ان تقصد ! فقد قلت الان انك تقر بوجود تشدد بل و جئت بمثال فبارك الله فيك و مفهوم التشدد الذي شرحته انت هو ما اعنيه حتما , الاتيان بالضعيف و التمسك به من باب اتقاء مواضع الشبهات و هذا ليس فقها ابدا

على فكرة انا مش بكره الامام محمد بن عبد الوهاب اطلاقا انا بكره ال سعود اللى وافقوا على اقامة دولة اسرائيل في فلسطين و عملوا نفسهم اهل الدين و الورع

و بحب سيرة الامام المصلح حسن البنا لكني اكره الاخوان و ابغضهم لانهم عكسوا مسار الدعوة التى ارادها حسن البنا و اقرنوها بالسياسة

على فكرة انا مقصدش الشيوخ دول بس .. انا اقصد كل مصري بيلبس اللبس ده في مصر


شكرا اخي و جزاك الله خيرا

طيب يا أخي الكريم
بالنسبة لموضوع الشيخ شلتوت
فأنا الكلام ده سمعته من ناس أزاهرة
وإنت تبحث وأنا كمان هبحث
آل سعود بتوع دلوقت غير آل سعود طبعاً بتوع زمان
زي أزهر زمان غير أزهر دلوقت

كده مش باقي غير حتة واحدة بقي الله يكرمك تعملها

-----------
عايز اعرف سبب واحد مقنع لارتداء رجال دين مصريين يعيشون في مصر لزي لا ينتمي لمصر و لا للدين الاسلامي غير انه نفاق اجتماعي مش اكتر .. يجعل من يشاهده يشعر بأنه اكثر تدينا لمجرد انه ارتدى رداء شيوخ اهل الحرمين
يمكن عشان صاحب القناة سعودي
------------

الحتة دي غلط جداً
بالله عليك يا أخي الكريم تشيلها
أولاً بداية القنوات الدينية أصحابها مصريين
الرحمة والناس والحكمة
فهمه مش هيعملوا كده علشان يرضوا حد
دي بقي حتة بتاعة ربنا ونوايا ملناش إننا نتكلم فيها

وكمان مش أكيد نفاق إجتماعي
أمال فين حسن الظن؟
دي ناس بنتوسم فيهم ونحسبهم علي خير وصلاح
بقي محمود المصري بينافق إجتماعياً
بيرائي الناس علشان يبان إنه شيخ؟
دي تهمة كبير يا أخي الكريم

وخاصة لإن تبينلك حقيقة قناة الخليجية
وبعد ما إتهمتم في العلن .. شلت الكلمة في الخفا
من الأمانة العلمية إنك تعلن علي الملأ إنك مكنتش صح
لأن الناس اللي بتدخل عندك شافت البوست من زمان .. وممكن يكون ناس إقتنعوا بيه

وموضوع اللبس ليك الحق إنك تعترض عليه براحتك
لكن مش هيه دي النقطة اللي هتخليك تتريق عليهم أو تتهم نوايايهم

علي فكرة التشدد مش إنك تقول النقاب فرض
لأن ده رأي محترم جداً وقال بيه أئمة كبار علي مر العصور
التشدد إننا نقول مفيش خلاف لأن محدش قال كده وده رأي شاذ
حبيت بس أوضحلك النقطة دي .. مع إني حاسس إنك فهمت كده برضه

علي فكرة أنا اكتشفت بالصدفة إنك صيدلي زيي يعني
يعني طلعت أبو زمل